روايه ملاذي الآمن كامله بقلم نوري

تتحسن هرجع بيتي اصلا مش عارفة ازاي هقعد في مكان واحد مع الكائن اللي اسمه سيف دة طلعت هدوم مريحة عبارة عن شروال وتيشيرت مريح لفيت حجابي وخرجت من الأوضة نزلت تحت لقيت نور قاعدة قدام التليفزيون
نور اية دة مرتحتيش ليه 
_ لا ارتاح اية انا جاية اكون مع مدام راوية طول الوقت
نور بس هي يا حببتي من كتر الأدوية اللي بتاخدها بتبقى نايمة دايما ف هيبقى عندك وقت فاضي كتير يعني هي دلوقتي اصلا بمجرد ما فطرت واخدت الدوا نامت
_ إن شاء الله تتحسن في اقرب وقت وترجع كويسة من تاني ومتقلقيش انا مش هقصر معاها
نور يارب يا دكتورة والله
_ اية رأيك نشيل الألقاب .. دة إذا حبيتي يعني
نور يا سلام دنا احب واحب كمان شكلك عسولة بجد
_ انتي اللي جميلة خلاص يبقى من هنا ورايح ليلى ونور وبس
نور اتفقنا
فضلنا قاعدين سوا تحكيلي عنها واسمعها عرفت انها منفصلة من سنتين وعندها ولد وإن بعد انفصالها سيف رفض تعيش لوحدها هي وابنها وجابها هنا وسطهم
نور لو تعرفي زياد بيحب سيف قد اية ربنا عوضه بيه عن باباه واهماله ليه
_ مبيطلبش يشوفه خالص
نور أبدا وكأنه مش ابنه راميه وكل اللي بيعمله أنه بيبعتله فلوس وبس مش قادر يفهم إن ابنه محتاج حنانه عليه مش فلوسه اللي بيبعتها ليه كل شهر
_ ليه مكلمتيهوش في النقطة دي
نور تفتكري معملتش كدة دنا ريقي نشف من الكلام معاه لكن هو ولا همه ف مبقتش اتكلم تاني وقررت اكون لأبني الأب والأم
مسكت أيدها اطبطب عليها ف ابتسمتلي وسكتنا معرفتش اقولها اية كلامها فكرني باللي مريت وحسيت بيه في طفولتي بس الفرق إن زياد لسة مامته موجودة ومتبتة فيه لأنه أهم شيئ في حياتها لكن أنا لا .. لا بابا ولا ماما معايا ولا اتمسكوا بيا خرجني من شرودي صوتها وهي بتغير الموضوع
نور احكيلي بقا عنك شوية 
_ اقول اية
نور اي حاجة هسألك انا يا ستي قوليلي .. في حد في حياتك
_ كدة على طول 
نور بحب الاسئلة دي اوي
ضحكت_ ما باين عموما لا يا ستي
نور اغبياء بقا حد يسيب الجمال دة كله
_ شوفتي بقا
نور ولا يهمك بكرا يجيلك اللي يستاهل قلبك
_ يارب طيب انا هطلع بقا اطمن على مدام راوية
نور ماشي وانا هحضر الغداء عشان معاد دواها ميتأخرش
_ انتي اللي بتعمليه
نور ايوا اصل من بعد تعب ماما وسيف متبهدل في حوار الاكل دة عشان مبيحبش ياكل من ايد حد غيري انا وهي ف بقيت انا اللي اعمل كل حاجة
_ ربنا يديمكم لبعض
ابتسمتلها وطلعت لأوضة مامتها كانت لسة نايمة وباين عليها التعب رغم إن اشاعتها وكل حاجة بتقول إنها كويسة ومجرد وقت بس وتتحسن لبست السماعة وقربتها منها بشويش اسمع ضربات قلبها كانت منتظمة إلى حد ما ودة طمني شوية قومت من جمبها وقعدت على كرسي في نهاية الأوضة مستنية ييجي معاد دواها عدى الوقت والمنبه اللي كنت ظبطاه على ميعاده رن قفلته بسرعة عشان ميزعجهاش وقربت منها اصحيها طبطبت على ايديها بشويش وانا بنادي بأسمها عشان تنتبه وتسمعني فتحت عيونها واخدت دقيقة تستوعب انا مين وبعدين ابتسمتلي
_ اسفة إني بقلق راحتك بس معاد دواكي جيه ولازم تاكلي وتخديه
راوية متتأسفيش يا جميلة
ابتسمت على الكلمة اللي تاني مرة تقولهالي من ساعة ما شافتني عدلت من قعدتها بطريقة تكون مريحاها ونزلت انادي على نور
_ نور .. يا نور
نور انا هنا يا ليلي .. في المطبخ
دخلتلها وكانت بترص الأطباق على صينية
نور ماما صحيت
_ ايوا كنت نازلة اقولك
نور انا خلاص خلصت اهو تعالي نطلع
طلعنا ونور قعدت جمبها تأكلها بنفسها رغم الإرهاق والتعب اللي باين على وشها إلا أنها كانت بتتكلم معانا وتهزر حسيتها ست بشوشة اوي وافتكرت سبب رفضها أنها تقعد في المستشفى مش بس مبتحبش جوها لا دة كمان مبتحبش تحس وتحسس اللي حواليها بأنها تعبانة وبتتعامل كأنها لسة بصحتها
_ راوية بقالك كتير شغالة مع دكتور سامي يا جميلة
_ ايوا خمس سنين
راوية حلو اكيد اتعلمتي منه كتير
_ دكتور سامي دة استاذي عمري ما أنسى اللي عمله معايا من اول ما اتعينت في المستشفى